Guwahati, July 24: Baghjan-o wa·al kamanichi neng·nikanirangko man·enggipa manderangna tangka paisarangko gamskachina gita dabie Baghjan oil field jolona dakanggipa ramako champenge jingjengatengmiting somoio Tinsukia-ni police-rang, ia manderangko katatna gita Sonibar salo bangbango gopongpong gita nangaha.
Ia biapo jingjengatenggipa manderangko police-rang, gol·dikrangchiba dokrurue a·rikgalna gitaba nangaha aro uandaken police-rangni dokanio jingjengatenggipa manderangoni sakbongade saknaanirangko man·aha. Jingjengatenggipa manderangni ro·ongrangko goanichi police-rangoniba sakbride saknaanirangko man·na nangaha.
Police-rangni u·iatani gitade, ia biapo jingjengatenggipa manderangko a·rikgalanio man·chakteljahani gimin police-rang, tear gas-rangko aro rubber gulirangchiba manderangko gona nangaha.
Re·anggipa bilsio Tinsukia a·jani Baghjan-o Oil India Limited (OIL)-ni gas well-ko wa·al kamgopani a·sel Baghjan jolo songdongenggipa manderang nangchakeaniko man·na nangahani gimin National Green Tribunal (NGT)-ni tik ka·gimin gita tangka paisarangko chu·gimik gamchina dabie ia jolo songdongenggipa manderang jingjengattokengachim ine nikna man·a.
Batanggimin antionin jegalenggipa manderang, oil field-ona dakanggipa ramako champengate, ia rama gita re·ruraenggipa garirangko aro Oil India Limited-o kam ka·giparangko champengengachim.
Sonibar pringo Tinsukia district administration-ni official-rang, police aro CRPF baksa ia biapona re·ange jingjengatenggipa manderangko dontongchina mol·moleahachim indiba changni chang mol·molani ja·manoba ia biapo jegalenggipa manderang jingjengataniko dontongna jechaktokahani gimin ia biapo jingjengatenggipa manderangko drae a·rikgalatchina ge·etaniko on·angaha ine Tinsukia-ni SP Debojit Deuri parakataha.
Ia biapo jingjengatenggipa manderangni u·iatani gitade, re·anggipa 2020 bilsini May 27 tariko wa·al kamgopaoni da·o bilsisa batpilengahaoba, wa·al kamanio noksan ong·atako man·gipa manderang chu·gimik tangka paisarangko man·kujaengachim.
“Baghjan-o wa·al kamgopanichi noksan ong·ako man·gipa ge 173 nokdangrangna gong lak 25 ka·e aro ge 439 nokdangrangna gong lak 20 ka·e compensation-ko gamchina NGT-ni expert committee tik ka·ahachim. Indake ong·genchimoba da·ona kingkingan ge 12 nokdangrangsan gong lak 25-ko, ge 161 nokdangrang gong lak 15-ko aro ge 439 nokdangrang gong lak 10 compensation-ko man·engkua,” ine jingjengatenggipa manderang parakataha.
