Agartala, Jan 5: Bristibar salo, North Tripura-o Jan Vishwas Yatra ba re·jomaniko ong·atgipa bakko ra·angengon, ma·mongni Home Minister Pa Amit Shah, Tripura-o ianpakoba gnigipa changna joljol BJP dolan sorkariko riktaigen ine parakataha.
Batanggimin bilsi-bongarango BJP, Tripura-o namgipa sorkariko rikna gita man·ahani gimino, manderangni ia rally ba re·jomanio bang·bee bak ra·tokanichi manderangni BJP dolo ka·donganiko nikna gita man·enga aro ia bilsio assembly election ong·nasienggipao BJP dolni bil-sasonona pil·bapiltaina man·gnikoba mesoksoaha ine Pa Amit Shah parakataha.
Re·jomao bakko ra·ange, Congress aro Communist ia dolgnikon Tripura a·dokode bon·tokaha ine agananengon, a·song gimikni silroro-namroroanina Modiji, pangchakanirangko songe on·aha indioba, Congress aro Communist dolrang Tripura a·dokna silroro-namroroaniko ra·baanio namen ja·manchakatskaaha ine Pa Amit Shah matnange aganangaha.
“Tripura eleksino, bakgittamoni bakgniko chegope BJP dol sorkariko riktaigen ine parakatengon, Congress aro communist dolrangko manderang nangniktokjaha maina Congress dolde a·song gimikon bon·aha aro Communist dolba a·gilsakon dongjaha ine parakatan baksa, ia km 1000 -ko re·jomanichi manderangni gisepo ka·donganirangko bilakatgen ineba Home minister parakatkuaha.
“BJP sorkari, songni-nokni manderangna rongtalgipa paikanarang, gas connection, rongtalgipa ringani chi, namgipa sana-banani cholrangko on·na ba sokatna gita man·aha ine janapatan baksa, Tripura-ko bol dolni ong·gijagipa kamrango, niam gri napdrabaanio, silchidare badingsrukanio, cha·bokanio, tribal-rangni kosako ong·gija dakani kamrangosa mingsing-minggamaiachim, indiba ia sorkari, bang·bea a·barangona namroro-silroroanirangkosa ra·baskaaha ineba ma·mongni Home Minister parakataha.
