Shillong, May 14: COVID-19 sajinmako champengna niamko ra·gatatao aro lockdown-ko ra·gatani somoirango tanggi tangani cholrangko peng·pangatanichi neng·nikaniko chagrongenggipa kam ka·e cha·gipa mande sakantina japrako gong hajal 6000 ka·e on·china Thma U Rangli-Juki aro Workers Power of Meghalaya, a·dok sorkario dabiangaha.
Iani bidingo a·dokni skotong minister Pa Conrad K. Sangma-na dolgni nangrime memorandum-ko on·anganio, BPL nokdangrangna on·enggipa cha·ani bosturang ba ration-ko lockdown aro sabisiko champengna niamko ra·gatatani somoirango dam gri indin on·chinaba uamang dabiangaha.
Uamangni aganani gita, bajar-antirango palna miksonge game-ge·e man·gipa biterangkoba minimum support price dake sorkarian brena nanga.
Sana-banani cholko namdapatani gimin janapengon, Shillong aro Tura mangmangosan Medical Corona Care-ko songna aro namdapataina nangja ine janapatenba, district-ni skotongrangoba indakgipa namgipa sana-banani cholrang dongna nanga ine TUR aro WPM agan-ku·pattiataha.
Shillong aro Tura songjinmao sajinmako sanchakna jakkalani ba Pre-Fab Corona Care hospital-ko songna gong kror 2.5 ka·e chame chu·gimik koros ong·gnigipa gong kror 5-rangko komiatna nanga aro apsandakgipakon district-ni skotongrango donggipa Civil Hospital-rang aro CHC-rango dongchape songna nanga ba uandakgipa biaprangko ta·raken namdapatna nanga ineba uamang parakangaha.
“Chingni minggipin dabianiara, corona saa man·giparangko private hospital-rangoba damgri indin sana-bananiko on·na nanga,” ineba uamang janapataha.
Sabisiko man·gipa manderangko noktangtango nape dongatna nangnike, sakgipinrangoni chel·tange noko nape dongmitingo dakchakaniko on·ani jekai cha·ani aro minggipin nangchongmotgipa bosturang baksana sana-banani bosturang jekai oximeter-rang aro samrangko noktango dingtang donenggipa sagipa mandena ba nokdangna on·aniko sorkari da·oba ra·bapiltaina nanga ineba uamang dabiangaha.
Sakgipinrangoni chel·tange noko nape dongna gita neng·nikaniko man·gipa a·jani manderangnaba sana-banani cholko on·an baksa indin man·gipa Corona Care Center-rangkoba sorkari kulie on·na nanga. Ia corona care center-rangko, songko-nokko sason ka·gipa institution-rang baksa nangrime chalaiatna nanga aro iana chu·onga gita tangka-paisarangko chamna nanga ineba uamang, memorandum-o janapatjolaha.