Tura, July 23: Sukrobar attamo, Tura-ni BJP MDC Bernard N Marak-ni bagan, jekon ‘Rimpu Bagan’ ine mingsing minggamachim, uko police-rang chadrapeaha aro ua biapo niam gri palenggipa churang aro gipin bang·bea bosturangko man·aha.

Police-rangni u·iatani gitade, me·chik saksa aro uni ripengko adita sak manderang, ‘Rimpu Bagan’-ona rimange, ua biapo donggipa kuturi ge·sao changni chang drae til·ekdraaha ine me·chikrangoni saksa kachario parakani ja·man police-rang, ia biapko chadrapeaha.

Bernard Marak-ni bagano, me·a me·chikrang kragija dake roenga aro chadamberang churing chupeke ong·sigipa kamrangko ka·enga ineba koborko man·soahani gimin police-rang, Sukrobar attam 6:00 bajimangoni ia biapko chadrapena a·bachengaha.

‘Rimpu Bagan’-ona sokangon, police-rang ua biapo gadang gittam donggipa nok, jeon chonchone tarigipa kuturi ge 30-mang dongachim, ua nokko nikeaha.

Police-rang, ua biapona sokangon, ua biapko nirokenggipa manderang, ua biaponi kate jokna jotton ka·ahachim indiba police-rang, ia biapko nirokenggipa manager aro gipin sakbri manderangko rim·na man·aha.

Ia nok gimikko police-rang chadrapenba kuturirangko re·rurae sandion, ia noko niam gri palenggipa churangko aro gipin bang·bea bosturang baksana me·a me·chikrangni kragija dake rochakna dongipa biaprangkoba nikaha.

Ia biaponiko police-rang, gari bol 36, mobile phone ge 47, chu ml 168268 aro bang·bea condom-rangkoba man·aha.

Iani bidingo police-rang, Tura-ni MDC Bernard Marak-ko Shillong songjinmani Sadar Police Station-o an·tangko bame on·echina gita aganatahachim indiba ia koborko parakatengmiting somoiona kingkingan ua an·tangko bame on·ekujaengachim ine West Garo Hills a·jani SP VS Rathore u·iataha.