Shillong, Nov 30: Re·baenggipa 2024 bilsini January jao ong·atna sienggipa Meghalaya Games-ko Tura-o sokachakna siengani gimin ia kal·susaaniko sokachakna tarisamsoanirangko nipilna gita Budbar salo, Meghalaya a·dokni Chief Minister Conrad K Sangma, a·dokni Sports Minister Shakliar Warjri aro dingtang dingtang official-rang baksa tom·aniko ong·atangaha.

Chief Minister-ni aganani gitade, Meghalaya Games-o kal·susachaknagipa biaprang, kal·susana sienggipa manderangko donchakani biaprang, cha·ani ringanirang aro uandakgipa dingtang dingtang nanganirangko tarisamsoani bidingo uamang chanchirimangaha.

Meghalaya Games-ko sokachakna gita tarisamsoani bidingo ua dingtangmancha deputy commissioner-rang baksaba internet gita agangrikaha aro kamrang nanga gitan matchotangengahani gimin ia kal·susaaniko namen matchotatna ka·dongsoenga ineba Sangma aganaha.

Meghalaya Games-o bak ra·na sienggipa sak 4000-mangni gita manderangko sokachakna Tura-o chu·onga gita biaprang dongjani gimin neng·nikanirangko man·na nangenga ine janapatengon, ia kal·susaanio bak ra·na sienggipa manderang aro official-rangko sokachakna gita sorkari rakbee kamrangko ka·enga aro ia kamko uamang somoi gitan matchotatna ka·dongenga ine Chief Minister parakataha.

Meghalaya Games-ko sokachakani bidingo sorkari, re·baenggipa December-ni 8 tariko Tura-o tom·aniko ong·atangtaigen.

Iakoba poraie nina man·gen: Simsanggre Soil and Water Conservation Division-ni gita song damgittamna bosturangko suala