Ankara, Feb 7: Turkey a·songni salgipeng-salaram jolo banggriani namen bilakanganichi dal·dalgipa nok-jamrang be·gruanio dapchapako man·e sigipa manderangko am·sandiatanio, a·songoni chel·chakgipa aro sandiatgipa dolrang somoina rikeming mikka aro suuri chiktotanirangko chake kamrangko ka·chichana gita nangao ga·akpilenga ine koboro parakataha.

Koborko man·ani gitade, mija Sombar pringo bilake banggrianichi Turkey aro sima-ari jol Syria a·song gimiko mande sak 5000 na batpilen siaha aro 15000 mangni gita jokkom ong·tokaha.

A·sel ong·ao sianggiparangko aro naljokgiparangko am·sandina gita sandiatgipa dolrang pring seng·baonin kamrangko ka·na a·bachengatenga aro manggisirangko man·daproroanichi sigiparang gadororokunaba gnang ine World Health Organization (WHO)oni mikrakatanikoba on·aha.

Indake ong·engon, banggrianichi duko ga·akgipa a·songna a·gilsak gimikan an·tangtangni bil ama gitade dakchakanirangko on·na gita jakrangkoba snilattokaha.

Banggrianio man·chapgipa biap Adana-o, a·sel ong·ani ja·man pilakan nokgri-jamgri gita ong·tokaha aro nok-jamrangko gimaatani ja·manba banggripiltaina gita manderangni gisepo da·omangba jajrengchipchipanian gapaienga. Uandake, Turkey a·songo chiktotpile sin·aniba re·baenggipa antio gadangni batgen ineba agansoanirang dongenga.