Tura, Feb 7: Garo Hills-oni gitcham UDP MLA aro minister Nimarson Momin, ru•utbea somoirangna saanirangko man•enba Sombar walo a•gilsakko watangaha. Ua bilsi 69 ong•ahachim.
A•gilsakko watanggipa Nimarson Momin, 1983 bilsini Meghalaya Assembly election-o skanggipa changna Indian National Congress (INC)-ni candidate ong•e Salmanpara constituency-o susaahachim indiba ua somoio ua AHL-ni Meckenson K Sangma-ni jako 254 vote-rangchi amako man•ahachim.
Uni ja•man 1988 bilsio ua apsan constituency-onin susataie seokako man•skaaha.
1993 bilsio Momin, Congress dolni Gopinath K Sangma-ni jako 424 vote-rangchi amako man•taiaha indiba 1998 bilsiode ua Gopinath K Sangma-ko 787 vote-rangchi cheenba seokako man•taiskaaha.
2003 bilsini Assembly election-oba ua gital NCP dolni tikitchi susagipa Gopinath K Sangma-ni jako amako man•taiaha indiba 2008 bilsiode ua UDP-ni candidate ong•e susaenba, seokako man•skataiaha aro ua somoio ua food & civil supplies baksana gipin department-rangni minister ong•aha.
