Shillong, Apr 18: Sonibar salo Deputy Chief Minister in-charge PWD (Roads & Buildings) Prestone Tynsong, Wahiajer songo kror 100-na batani projectrangko oprake on·enba, MDA sorkarini silroro-namroroaniko ra·bana kam ka·ani gimin janapenba, an·tangtangni gisepo meligrikgijanirangni bidingo chanchirimanirangko dake namatna nanga ine aganangaha.
Ia tom·bimonganio deputy chief minister Sniawbhalang Dhar, health minister Wailadmiki Shylla, gitcham cabinet minister aro Raliang-ni MLA Comingone Ymbon, UDP Mawsynram MLA Olan Sing Suin, Nongpoh MDC Rona Khymdeit, Commissioner & Secretary Dr Vijay Kumar aro gipin a·gipi dilgiparang bak ra·angaha.
Salni bako oprake on·gimin project-rangara state road fund-ni ning·ao tikatgimin kror 100-ni U.N Road, Pdein Mkhim, Sohpoh Mookabeng aro Kdohkule, Wahiajer-ni Multi Sports Complex-ni sepango lak 89.20-ni National Games-na rikenggipa biao, Wahiajer songo silroro-namroroanina kror 2.0-ni rikani aro tarianirang, aro JJM-ni ning·ao Wahiajer Water Supply Scheme ong·a.
Una agreba Tynsong Multi Sports Complex, Wahiajer-ni Multi Sports Complex-o Athletic track and infield football ground-na 1400 Lux-ni bijoli tekanirangko kror 8.94-chi ka·angna, aro Central Roads Infrastructure Fund-ni ning·ao 2025-26-na Jowai central division aro Jowai South Division-ni ning·ao kror 20.92 tangkarangchi ramarangko tarina aro namdapatna pangchakani ro·ongrangko songe on·angaha.
Jinmana parakatengon, Tynsong Deputy Chief Minister aro Nartiang-ni MLA Sniawabhalang Dhar-ko mitelenba, ua an·tangni constituency-ni, songdonggipa jolni aro a·dokni gimikni manderangna dangdike on·na krenge kam ka·gipa ong·a ine aganangaha.
“Skotong Minister Conrad K Sangma-ni dilanichi chinga bilsi chet-na a·doko dangdike on·engaha. 2018 bilsi dipetonin Meghalaya gimiko dingtanganirangko nikna man·engaha,” ine ua parakatangaha.
“Anga 2018-oni 2023-ona gualna man·ja. Basakobarangde angni mikronona mikchirang ong·baa. Chinga Covid pandemic-ni somoio tusinapgijanirangko chagrongaha, indiba Isolni ka·saanichi an·ching da·alo iano ong·enga,” ine ua gisik ra·atpile aganangaha.
“Re·anggipa bilsio, chinga Shillong-o nangchongmotgipa project-rangko matchotatna man·aha. Uarangoni mingsara Crowborough Hotel ong·a, jean ru·uta bilsirangna mikronna nidikaniko on·aha. Uko da·ode matchotahani gimin, uchi re·angode Delhi-o gita chacha ong·pilaha. Gnigipara Mariott Hotel ong·a. Delhi-oni VVIP-rang baksa bang·a tom·bimonganirangko ia damgni five-star hotel-rango ong·atenga. Ian an·chingni a·dokna namen rasong chaani aro dal·begipa pattiani ong·a,” ine Tynsong aganangkuaha.
Una agreba, a·dokni bang·a chadamberangan hospitality sector-o poraie-skie ra·manani ja·mano ia hotel damgniona re·bapile kam ka·enga ineba ua aganangaha.
Mikkangchi kamrangko ka·angkuani bidingo sing·e nion, bang·bata hotelrangko rikangkuna ine a·dok sorkari chanchisamsoenga ine ua parakataha.
“Bang·a MoU-rangko soi ka·aha, aro re·baenggipa adita bilsirangni gisepon, Shillong aro a·dokni gipin biaprango dam gittam dam bri five-star hotelrang sokbagen ine anga bebera·a. Ia project-rangni matchotani ja·mano, a·songni dingtang dingtang bakrango kam ka·enggipa hajalni hajal an·chingni chadamberang re·bapile a·doktangon dangdike on·egen,” ine ua agandapangaha.
Uandake, project-ko jegalgiparangni bidingo uni chanchianiko sing·e nion, iandake meligrikgijanirangkode damsan tom·e chanchirime namatna nanga ine ua talatangaha.
Una agreba, so·sojengjeng ong·anirangni bidingo janapengon, MDA-I aro MDA-II sorkarirangara so·sojengjeng ong·anirangko namatna bilgrigipa sorkari ong·a ine saobarang agangenchimoba, dilgiparang ong·e uamang gisik ka·sine dongna nanga aro agangrikanirangko dakna uamang jechakha aro a·dokni manderangba uamangni ka·enggipa kamrangko ma·sina nanga ine ua aganangaha.
Ua Jaintia Hills-koba rasong on·e aganangaha aro uno donggipa manderang mandeskana bimung namgijaniko ra·bana kam ka·rongja aro dosko nikgenchimoba uamangko uko namatna jotton ka·a aro iani a·selsa ua jolo silroro-namroroanirangko bang·en nikna man·enga ine ua janapangaha.
Na·simang iakoba nina man·gen:
Na·simang iakoba poraina man·gen: Garo Hillsoni SSLC Topperrangni namprete chu•sokanina CM an•sengpaa
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
