Shillong, Feb 16: Re·baenggipa April jani 9 tariko GHADC-na pu·onaniko ong·atnasienggipana a·joltangni niksenggipa political dolni pilakko tarisamsoanio, a·jani namnamgipa candidate-rangkon chinga susaatgen ine United Democratic Party (UDP)ni skotong dilgipa Pa Metbah Lyngdoh mijalo parakataha
Da·o Meghalaya Assembly-ni agan-chalaitimgipaba ong·enggipa Pa Lyngdoh, adita salrangna skang mangmang East Garo Hills, Williamnagar aro South Garo Hills, Baghmara-ona wenangenba dolni dilgiparang baksa tom·aniko ong·ate eleksinni bidingo agan-chanchigrikangaha.
Da·odipetde, GHADC eleksino susanakenggipa sakgittam candidate-rangni bimingrangkosan uamang dol parakatengkua.
“UDP doloni ia eleksino susana sikenggiparang pilakna chinga dorgastorangko on·china okamenga, indake chinga da·o bang·a dorgastorangkon man·soenga. Dorgastorangko on·china chinga ia ja February 23 tarikona somoiko on·enga,” ine Pa Lyngdoh mijal Sombar salo kobor ra·timgiparangna aganaha.
Ianpakni eleksino chinga bang·a seat-rangon susaatna miksongenga ine aganan baksa, chinga iani gimin re·baenggipa February jani 23 tarik ja·manosa talbate agana gita man·gen, indiba ianpakode chinga bang·a namnamgipa candidate-rangko seokenba susaatenga ineba UDP-ni padot, sing·anirangna aganchakaha.
Indake ong·engon, eleksinni ja·man dolni chu·sokate on·na ku·chakanirangko chappa ka·ani gimin uamang ge·sa committee-koba songaha aro ia eleksinna nangchongmotenggipa mamlarangni giminba committee-an gimikko nigrike tik ka·gen ineba Pa Lyngdoh u·iatjolaha.
