Shillong, Feb 16: A·doko Inner Line Permit (ILP)ko ra·gatani bidingo ma·mong baksa agangrikaniko changni-chang ru·utroroatenganina suk ong·gijaniko parakengon, ILP-na ma·mong baksa agangrikanikon da·ora kal·ake roa gitasa niksrangaengaha ine Congress dolni MLA Dr. M Ampareen Lyngdoh mijalo aganaha.
“Iani bidingo agangrikani banona sokanggen da·onan on·timintiba u·isokujaenga ine aganengon, apsandake iani gimin mol·molaniba gnang jeon a·dokni gimik sak 60 MLA-rangan skotong Delhi-china doangsrangenba ma·mong sorkariko ILP-ni mamlao su·dodoangna gita ma·mongni home minister-ko grongna nangao ga·akengaha, ine minister gitcham parakataha.
“Iani giminan, adita sak cabinet ministerrang ru·utgija salrangna skang mangmang ma·mong sorkari baksa agangriktaienba India sorkariko su·dodoange a·dokna ILP-ko on·ama on·jawa ba on·ja ong·ode mai a·selni gimin on·ja uko mangmang tale ra·bana gita Delhi-china doangaha ine chinga knasoaha, indiba uaba maming kaman ong·bajaha. Ja·mano a·dokni CM-ni koborni manderangna talataniko knarikani gitade MRSSA baksana iako uamang agangrikenga inesa nikatna man·skaaha. Uni gimin, re·baenggipa March jani gisepo iani gimin agangrikna uamang an·tangtangna somoiko ra·taenganio ian namen a·dokni manderangna dukni katta ong·a,” ine ua agandapaha.
Chinga Congress dolni dilgiparang, batanggimin chango ma·mongo sorkariko rikmiting somoio bak man·pagipa ong·e namen rasong gnangbea, indake Meghalaya a·dokna ILP-ko ra·gatna nangani dongja ine chingna agantaitaie on·angaha, indiba ja·mano UPA sorkari baksa ua somoio jera-ra·on Meghalaya a·doko Inner Line Permit-ko ra·gatani niamrango adita dingtanganirang donganiko chinga nikaha.
“Indioba, ma·mong sorkarini CAA-ko parakatani ja·man aro Meghalaya a·dok gitan apsan niamo neng·nikaniko chagronggipa Manipur a·dokna ILP-ko on·angani ja·mano chinga namen aiao inmanaha, iano pangchake ILP-ni bidingo chanchipiltaiani gisik chingo nakataha, iani giminsa Congress dolni dilgiparang a·dokni gimik sak 60 MLA-rang baksa ILP-na chu·gimik chakpaaniko on·na tik ka·aha,” ineba ua janapataha.
Indake ong·engon, ILP-ni gimin agangrikna mikkang March jako somoi ra·taienganina ian namen ra·chakna amgijani ong·a ineba Ma Lyngdoh suk ong·gijaniko parakataha.
