Shillong, Jan 11: Bilsi gittam batpile rikenggipa Umpling dolongko re•baenggipa March jani bon•angachibara manderang re•rurana gita kulie on•gnok.
Ia dolongko rikani bidingo Mongolbar salo, Meghalaya Legislative Assembly-ni Public Accounts Committee (PAC), tom•e chanchirimangaha aro ia tom•anio PAC-ni chairperson Charles Pyngrope aro gipin member-rang, jekai HM Shangpliang, Comingone Ymbon, Nujorki Sungoh aro gipin dilgiparangba bak ra•angaha.
Tom•a matchotani ja•mano PAC-ni chairperson Charles Pyngrope, kobor ra•timgipa manderang baksa agangrikengon, sajinmani a•sel aro a•doko mikkarang jimbee waangahani a•sel ia dolongko somoi gita matchotatna man•jahaoba da•o ia dolongko rikanirang matchotengaha ine an•tangni kusi ong•aniko parakataha.
Ia Umpling dolongara Shillong songjinmani bakgniko nangdimeatgipa dolong ong•a aro ia dolongko March jani bon•angachibarade manderang jakkalna man•gnok ineba Pyngrope parakataha.
2017-18 bilsio a•bachengatgipa Nongrah water supply scheme-ni gimin janapatskaengon, ia bilsionide manderang ia water supply scheme-oniko chirangko jakkalna man•gnok ine Pyngrope parakataha.
