Shillong, March 10: Khasi Hills a·jao mingsa dal·a obosta ong·ani koborko knasoani gita, Upper Shillong-ni 7th Mile-o donggipa bol ratgipa biapko mija Bristibar walni 11 ata bajimango wa·al kamgopaha.

Koborko on·ani gitade, bol ratna jakkalgipa biapara saksa Arbes Kharsati -ni ong·achim aro unwal wa·al kamanichi bol ratani kolrang aro bolrang gong lakrangni gita noksan ong·atako man·aha.

Wa·al kamchichaani koborko man·a tapan fire department-ni bolbri garirang a·damona sokangani ja·man konta-gnimangna wa·alko kimite galna gita jotton ka·e chu·sokahaoba chu·gimikkon tapra changpile kamtokahani gimin maming mingsakoba man·rikjaha.

U·iatani gitade, wa·al kamchakatani ja·pangko da·odipet ma·sikujaenga indiba ia wa·al kamanichi gong lak 25 ba 30 rangni gita gamchatgipa bol ratani kolrang wa·alchi nisiatako man·tokaha.