Shillong, Dec 8: West Jaintia Hills a•jani dingtang dingtang rama jal•langrangko tarina gita a•dok sorkari, gimik gong 84,14,37,000/- tangkarangko chamataha aro ia ramarangko tarina gita Bristibar salo, a•dokni Deputy Chief Minister aro PWD (Roads) Minister Prestone Tynsong, pangchakaniko songe on•angaha.
Ia rama jal•langrangko tarina pangchakaniko songe on•angani somoio a•dokni Urban Affairs Minister Sniawbhalang Dhar aro Jowai MLA Wailadmiki Shylla-ba dongpae bak ra•angaha.
Sorkarini chamatgipa gong 84,14,37,000/- tangkarangoni gong 1,20,87,000-kode Niriang songni ramako metal aro black topping on•e taridapna, gong 2,13,50,000-kode Madan Thadlaskein-oni Mission Aitnar gita Mutong Road-ona nala aro kapenganirangko tarina, gong crore 2-kode Sabah Muswang songni ramako metal aro black topping on•e tarina, gong crore 5-kode Mihmyntdu songni ramako metal aro black topping on•e taridapna, gong crore 28-kode World Bank MITP-ni ning•o Jowai jillani ramarangko taridapna, gong crore 80-kode KNB Road-oni Thomas Jones College-ona dolong tarina aro gong crore 45 tangkarangkode Demthring-Sohmynting-Moodymmai ramako apalbatate aro nambatate taridapna ong•enga.
Ia rama jal•langrangko tarina gita pangchakaniko songe on•angani somoio a•dokni Deputy Chief Minister aro PWD (Roads) Minister Prestone Tynsong, tom•anio bak ra•giparangna aganprakangengon, a•dokni pilak biaprangon namroro silroroaniko ra•bana aro mongsongbate rama jal•langrangko nambatatna gita on•kange kamko ka•engani gimin a•dok sorkariko mittelpilangaha.
Jowai constituency-ko tang•doatna gita an•tangko on•kange kam ka•engani gimin ua dingtangmancha Jowai-ni MLA Wailadmiki Shylla-koba mittelpilangaha.
Ia rama jal•langrangko tarina pangchakaniko songanio Jowai-ni MLA-ba jinmana aganprakangengon, ia jolrango donggipa rama jal•langrangko namdapatna aro mongsongbate KNB Road-oni Thomas Jones College-ona dolongko tariengani gimin aro Demthring-Sohmynting-Moodymmai ramako apalbatate aro namdapate tarie on•engani gimin a•dok sorkariko mittelpilangskaaha.
