Williamnagar, Nov 08: Chibol ba warirangko aro uni samtangtangko ripinge rakkiangna gita songni-nokni manderang baksa nangrime kamko ka·na Williamnagar Goverment College, uamangni Community Outreach Programme “Adopt-a-Lake” -na East Garo Hills a·jani Bolkinggre songo donggipa Memo Lake-ko mija November 7 tariko seokangaha.
Mongolbar salo ia programko a·bachengate on·anga baksana Williamnagar Govt. College, East Garo Hills a·jani Additional Deputy Commissioner, MCS, Pa A Ch Marak-ni dongpaanio Memo Lake-ko rongtal-an·talanikoba dakangjolaha. Uandake, programona dingtangmancha okamako man·giparangoni, EGH a·jani Superintendent of Fisheries, Ma H. A. Sangma, Fishery Officer Pa K. O. Sangma, Tourist Officer Pa M. Marak, Bolkinggre songni padot Pa O. C. Sangma aro Bolkinggre-ni Nokma Pa P. K. Sangma-maang gimikan bakko ra·angtokpaaha.
Pilak samtangtangko ripingna nangani gimin aro uarangni gamchataniko manderangna ma·siate on·ani kam gita, salni bako rongtal-an·talaniko dakanganio college-ni Principal, pilak skie on·enggiparang aro chatro-chatrirang gimikan bak ra·angtokaha.
Indake ong·engon, East Garo Hills a·jani ning·o donggipa pilak janggi gnanggiparangko tange rakkina, chiring-chibisikrangko ripingna man·na gita college-ni chatro-chatrirang, college-o skie on·engiparang aro college-ni gipin staff-rang mikkang bilsi-bongana kingking songni-nokni manderang baksa nangrime kamrangko ka·angna miksonge ia college, uamangni Community Outreach Programme-na Memo Lake-ko seokaha.
