Baghmara, Nov 8: Mongolbar salo, Meghalaya a•dokni Chief Minister Conrad K Sangma, South Garo Hills a•jani gital Siju C&RD Block-ko songe on•angenba, ia jolrango songdongenggipa manderangni jumangko be•en pil•ate on•angaha.
Ia gital block-ko songe on•angani somoio Assembly-ni Deputy Speaker Timothy D Shira, Siju-Rongara-ni MLA Rakkam Sangma, Williamnagar-ni MLA Marcuise Marak, Rongjeng MLA Jim Sangma, Kharkutta-ni MLA Rupert Momin aro Garo Hills Autonomous District Council (GHADC)-ni Chief Executive Membor Albinush Marak-ba dongpae bak ra•angaha.
Ia gital block-ko songanina Siju jolrango songdongenggipa manderangni kusi ong•e manianirangkoba nikna man•aha aro ia program-o dingtangmancha Atongrangni mongsonggipa Chugan chrokanikoba nikangna man•aha.
Ia gital Siju C&RD Block-ko a•dokni skanggipa Chief Minister aro Meghalaya a•dokko man•dile on•chenggipa Captain Williamson A Sangma-na on•kangangengon, a•doko pilakni gitan namroro silroroaniko ra•bana NPP-chi dilenggipa MDA sorkari kam ka•enga aro ia gital Siju C&RD Block-ko songanichi ia jolrangoba sorkarini ra•gate on•enggipa dingtang dingtang scheme aro program-rangko nambate chu•sokatna man•gnok ine Chief Minister parakataha.
A•doko songdongenggipa manderangni janggi tangani gadangko dingtangatna gita sorkari, dingtangmancha ramram manderangna dingtang dingtang program-rangko a•bachengate on•aha ineba Chief Minister parakataha.
The demand for the Siju C&RD Block was long-drawn & today marks a momentous chapter for the District- the birthplace of Meghalaya’s 1st CM, Capt. Williamson Sangma.
We dedicate this new dawn, marking Meghalaya’s 50th Statehood milestone to him pic.twitter.com/prWW9s26hx
— Conrad Sangma (@SangmaConrad) November 8, 2022
Siju-Rongara jolrangara Meghalaya a•dokni itihaso namen gamchatbegipa biap ong•a maina ian a•dokni skanggipa Chief Minister Capt Williamson Sangma-ni atchiram song ong•a, jean Tribal manderangko aro uamangni bilrangko chel•chakna gita rakbee warachakaha ineba Sangma aganaha.
Batanggimin bilsi 50-ni gisepo bang•a dilgiparangan, a•dokni namroro silroroanina an•tangtangni bil ama gita on•giltokaha ine janapatengon, da•aloba Meghalaya a•dok dingtang dingtang a•bao ja•manchakengkuani gimin uni sorkari, a•dokko mikkangchi ra•doangkuna gita kang•kare kae kam ka•enga ine Chief Minister parakataha.
