Williamnagar, Sep 1: Bristibar salo, Meghalaya a•dokni Chief Minister Conrad K Sangma, Housing & Urban Affairs-ni Minister of State (MoS) baksa mongsonggipa ‘Williamnagar Urban Water Supply Project – Phase I’-na pangchakaniko, Meghalaya a•dokni PHE Minister Renikton Lyngdoh Tongkhar, Williamnagar-ni MLA Marcuise Marak, Rongjeng-ni MLA Jim Sangma aro Rajabala-ni MLA Abdus Saleh-ni dongpaanio, songe on•angaha.
Ia Williamnagar Urban Water Supply Project Phase-I-na AMRUT 2.0-ni ning•o gong kror 121 tangka paisarangko India sorkarini Housing & Urban Affairs Ministry chamataha aro ia scheme-ara Williamnagar-o songdongenggipa manderangna 2050 bilsiona kingking chirangko on•na dakchakani ong•gnok.
Ia Urban Water Supply Project-na chirangko Chibe minggipa chiringoniko salbana gita tik ka•e donmanaha maina ia scheme-na salprakon litre 8,33,335.00 chiko nangengani gimin ia chiring nangani kri chiko on•na man•gen ine nikaha.
Ia Williamnagar Urban Water Supply Project-ni phase-I-na pangchakaniko songe on•angani somoio a•dokni Chief Minister, jinmana aganprakangengon, uni pagipa Purno A Sangma sagini chang 75-gipa atchiani salko manianio ia project-na pangchakaniko songahani gimin Minister of State-ko mittelpilangaha.
PA Sangma sagi, a•dokni aro a•songni namroro silroroanina an•tangko on•kange kamko ka•ahani gimin uni chang 75-gipa atchiani salo una dingtangmancha mande ra•pilskaaniko on•enga ineba Chief Minister aganaha.
A•dokna aro mongsongbate Williamnagar jillao songdongenggipa manderangni namgnina ia project-ko ra•gate on•ahani gimin ua dingtangmancha Housing & Urban Affairs Ministry-koba mittelpilangaha.
Ia project-na tikkele kamrangko ka•dilahani gimin ua a•dokni PHE department, PHE Minister aro jolni MLA-koba mittelpilangaha.
Water Supply scheme-ni ning•o donggipa dingtang dingtang project-rangni gimin jinmana talate on•angengon, da•o a•dok gimiko gong kror 2000-ni project-rangko jako ra•e ka•engaha ine Chief Minister parakataha.
East Garo Hills a•jani namroro silroroanina ra•gatgipa kamrangni gimin janapatskaengon, Williamnagar jillani ning•o donggipa ramarangko taridapna gita gong kror 25-ni project-ko ra•baengaha ine Chief Minister parakataha.
Meghalaya a•doko dingtanganiko ra•bana ia sorkari kamrangko a•bachengataha aro batanggimin bilsi 4.5-ni gisepon a•doko ta•raken namroro silroroaniko nikna man•aha ineba Chief Minister aganaha.
Ia Urban Water Supply project-na pangchakaniko songe on•angani somoio Housing & Urban Affairs-ni MoS Kaushal Kishore-ba jinmana aganprakangengon, salgro salaram a•dokrangna a•songni Prime Minister Narendra Modi-ni simsak nirokanirangko on•engani gimin manderangna gisik ra•atpilaniko on•angaha.
Ia Williamnagar Water Supply Project-ara Williamnagar-o donggipa nokantinan chirangko on•na gita sorkarini a•bachengatgipa project ong•a ineba Kishore aganaha.
A•doko namroro silroroaniko ra•bana tikkele kamrangko ka•dilengani gimin ua dingtangmancha Meghalaya a•dokni Chief Minister Conrad K Sangma-koba mittelpilangaha.
