Shillong, June 7: Meghalaya a•dok gimikon antigimikna manianggipa World Environment Week-ko Mongolbar salo, Shillong songjinmani U Soso Tham Auditorium-o matchotataha aro ia manianiko matchotatani somoio Meghalaya a•dokni Chief Minister Conrad K Sangma, a•dokni Forest & Environment Minister James PK Sangma, dingtang dingtang sorkari officer-rang, chatro chatrirang aro a•dok gimikni village committee-rangba dongpae bak ra•angaha.
Ia tom•anio a•dokni Chief Minister, jinmana aganprakangengon, ia anti gimikna ong•atanggipa program-ara samtangtango ong•telaigiparangko tange rakkina mikrakataniko on•nasan ong•aigija, samtangtango ong•telaigiparangko ripinge rakkianio a•doko songdongenggipa mande sakantian maiko on•gilpana man•gen, uko ma•sie ra•na on•ani cholba ong•aha ine parakangaha.
Samtangtango ong•telaigiparangko ripingna sorkarini kamrangni gimin janapangengon, iandakgipa kamrangna sorkari, gong kror 4700-mangni gita dakchakanirangko gipin biaprangoniko man•bae on•na man•aha ine Chief Minister parakataha.
Ia tom•anio a•dokni Forest & Environment Minister James PK Sangma-ba jinmana aganprakangengon, samtangtango ong•telaigiparangko ripinge rakkina kam ka•anio technology-rangni dakchakanichi mai dakgipa kamrangko ka•na man•achim, uarangni gimin talataniko on•angaha.
Ia tom•anio a•dokni Chief Minister aro gipin dilgiparang, dingtangmancha Forest Management Plan-rangkoba a•bachengate on•angjolaha.
