Shillong, Jan 25: UDPni padot aro KHADC-ni MDC-na nominate ka•ako man•gipa Bindo Mathew Lanong, 1987 ni Chandrachur Committeeni reportko skango Congressrang niam gita kam ka•genchimode, Assam aro Meghalayani si-ma arini gimin kajia golmalrang dongjawahachim ine aganaha. Assam-Meghalaya sima- ariko tik ka•na ine Chandrachur Committeko a•dok ge•gnini sorkarirang songe on•ahachim. Unomiting Assam, Meghalaya aro ma•mong sorkarioba Congress rangan bilo ong•ani gimin, uamangan iarangko tik ka•grike dona nangahachim, uamangni simsakgijani a•selo da•al an•ching ia neng•nikanirangko chagrongna nangskaengjok ine ua aganangaha.
Hill state leaderang sima-ariko simsakgija dingtang a•dokko man•asa krengdilaiaha, uamang sima-ariko tik ong•e donchengesa kam ka•na nangachim ine sing•gipana aganchakon, “ An•chingara dingtang a•dokko man•asa krengani gimin unan kingkot kam ka•na nangaha, sima-arikode ja•mano tik ka•grikna man•aiani gimin anga Hill stae leaderrangni miksongani aro chanchisoanirangko ong•e nikaia aro namnikaia, uamangni kam ka•anirangko jeani dongja” ine Lanong agandapaha
