Shillong, April 12: Meghalaya a•doko reservation policy-ni roster system-ko ra•gatani bidingo dingtang dingtang dolrang jera ra•griktokengon, a•doko roster system-ko ra•gatani bidingo chanchirimna gita Budbar salo, Jaintia Hills a•jao dingtang dingtang dolrangni nangrime bikotgipa Jaintia Coordination Committee for Reservation Policy (JCCRP), dingtangmancha tom•aniko Jowai-o ong•atangaha.

Ia tom•anio JCCRP-ni dilgiparangko seokangengon, committee-ni chairman-na Jaintia Students Union (JSU)-ni president Jersom Shylla-ko, vice chairman-na JSU-ni general secretary Treiborlang Suchen-ko, committee-ni secretary-na EJNC-ni president Samborni Lyngdoh-ko aro joint secretary-na JYF-ni president OL Tariang baksana Roitre Dkhar-ko seokangaha.

Ia tom•anio dingtang dingtang dolrang baksa JCCRP-ni dilgiparang chanchirimangengon, 2023 bilsionisa nangchakate roster system-ko ra•gatchina sorkario dabigen ine jinma tik ka•e donangaha.

Re•baenggipa salrangoba JCCRP-ni tom•aniko ong•atangkuna gita jinma tik ka•e donangaha.