Shillong, July 19: Tangka-paisani gita neng·nikanio ga·akenggipa Mawmluh Cherra Cement Limited (MCCL)-ko private baksa nangrime mikkangchi chalaiani gimin chanchie ra·baaniko a·dokni Cabinet, Sombar salo ra·chakangaha.
Iani bidingo Sombaro tom·aniko ong·ata ja·man koborni manderangna aganengon, a·doko da·omiting tangka-paisao neng·nikaniko man·engani gimin aro indaka somoio gong kror 190 tangka-paisako botna gita a·dokni amsokgijaniko niate karkanako dolgni nangrime chalaina gita agan-ku·pattianirangko on·aha. MCCL-ko mikkangchi private baksa nangrime chalaiani gimin kamrangko ka·chakatna gita ia chanchie ra·baanirangko cabinet da·alo ra·chakangaha ine skotong minister Pa Conrad K Sangma parakataha.
Batanggimin jadok ba jachetrangoni MCCL -o kam ka·enggiparang, karkanako nirokenggiparang, a·ani nokgiparang aro gamni nokgiparang aro ua joloni dilgiparangko man·chape iana gisiko nanggipa bang·a manderangkon grongangaha ineba skotong minister u·iataha.
“Angni gadango, officialni gita chang-gittam grongna nangachim indiba officialni gita ong·gija anga uamangko changdok ba changsnina kingking grongaha,” ine Pa Sangma janapatkuaha.
Pa Sangma-ni agankuani gita, bang·a tangkarangko nangengani a·sel aro MCCL da·o bang·en grorang dongan baksana bosturangko bang·e bikotna man·jaengani gimino iako maidakgipa cholchi chakatatpile mikkangchi chalaina man·gen iani gimin chanchirime tik ka·ona sokaiaha.
Tom·ao minggittam cholrangni gimin chanchirimaha, jeoni karkanako chalaina a·dok sorkari gong kror 190-ko botani, MCCL-ko chalaipilna gita bakrime kam ka·nasigipako sandiani ba MCCL karkanako chu·gimik chipatani gimin ong·a ineba Pa Sangma talataha.
Industries department-oni survey-ko ka·ani gitade, gimaanirang baksasa MCCL-ko chalaibaaha.
