Shillong, April 21: A·jani Deputy Commissioner-rang aro health official-rang baksa video conference-ko ong·ate, a·dokni skotong minister Pa Conrad K. Sangma, Butbar salo a·dokni pilak district-rango sajinmani obostarangko nipilangangaha.
Skotong minister-ni aganani gita, salantian mamlarang tang·dorikrikengani a·sel a·doko da·o sajinmani obostarang namen namrorojaenga indiba mikkangchi ia sabisiko champengna amsokgijagipa obostako chagrongjana gita da·onin simsake pilak kamrangko ka·sona nanggen ine aganenba, “Delhi aro Mumbai-rango gita apsan obostarangko chagrongjana gita champengsoanirangko dakna nanggen aro iana COVID sajinmana dongimin niamrangko raken ja·rikachi aro sajinmani tikarangko su·achi an·tangtangna naljokaniko on·na amgen,” ine Pa Conrad aganaha.
A·dokko chipchangna nangkugijani giminba skotong minister aganaha, jean iako dakaniara a·dokni economy-ko champenganirangko komiatna jotton ka·ani ong·a, indioba, a·dokni economy-ni obostarang aro manderangni an·seng-baljokani ia minggnini gisepo tiktak ong·na gita nangskagen ine Pa Sangma agankuaha.
Sajinmana tika su·anirango chu·sokgijagipaoni Meghalaya a·dokba damsa ong·paa ine u·iatengon, a·dok sorkarini gisik on·bate kam ka·anian re·baenggipa sal 10-rangni gisepo tika su·anirangko baridapatani gimin ong·gen ine aganangan baksa, “Mongsong nangbatenggipa biaprangko sandie re·baenggipa antisani gisepon sajinmani tikako su·na man·gipa sak lak 6.5 mang manderangna tikarangko su·na gita chinga nisanko donsoenga,” ine skotong minister agan-talataha.
Tika su·na cholko man·gipa sakantikon re·bae an·tangtangko an·chake on·etokchina didianiko on·an baksa, dingtang dingtang dolrang aro dingtangmancha iana gisik on·e kamko ka·enggiparang jekai Dorbar Shnong-rang, nokma-sordarrang, toromni dilgiparang ba ugitarangkoba sajinmana tikako su·na nangani gimin manderangna agan-skie aro didianirangko on·anio bak ra·pachinaba Pa Sangma mol·molangjolaha.
“Tika su·anichi alamila saana agrede chu·gimikan naljokani gnang, aro tikako su·ani ja·manba sabisini adita saani rokomrangde dongkuaia indiba tikako su·sranggijagipa manderangna bate champengani dongbatenga ine aganenba, tikako ra·ani ja·manba dongimin niamrangko ja·rikna gita nangkuaigen ine skotong minister agandapaha.
Iani gisepon, jolni adita dam biaprango sajinmani tikako su·chakenggipa biaprangonaba skotong minister re·ange nirokeaha aro tikani gimin manderangni jajrengani ba kenanirangko chel·atna, tikako su·gipa adita sak manderang baksaba agan-golpogrikangjolaha.
