Guwahati, June 9: Tourism-ko tang·doatna dingtang dingtang cholrang donganirangni gimin damsan chanchirimaniko donenba, India-ni salgro-salaram a·jolrango tourism-ko tang·doatna gita Bristibar salo, Adani Airport Holdings Limited (AAHL) salsani seminar-ko Guwahati Airport-o ong·atangaha.

Tourism-ni bidingo seminar-ko ong·atanggipao, Assam-ni Tourism Minister, Pa Jayanta Mallabaruah, AAHL-ni seoke watatgipa manderang, Airline-o kamko ka·enggiparang aro salgro-salaram a·dokrangoni tourism department-ni adita sak dal·dalgipa manderang baksana, Lokpriya Gopinath Bordoloi International (LGBI) airport-ni airport authority-rangba bakko ra·angtokaha.

A·dokni tourism minister Pa Mallabaruah, seminar-o jinmana aganprakangengon, bangbang gita manderangko salruruenggipa ba air transport, biap ge·sa-gegipino janggi tangenggipa manderangni gisepo dingtang dingtang dakbewalrangko ma·sigrike ra·na gita namgipa cholkosan on·aigija tourism-ko tang·doatna gitaba dakchakenga aro Assam a·doko tangka-paisani gadangko tang·doatanioba air transport mongsonggipa bak ong·enga ine aganangaha.

“Dingtang dingtang dakgipararangchi salgro-salaramo Tourism Industry-ko tang·doatanio airport-rangni kam” ingipa katta ja·pango pangchake, Guwahati Airport-o chanchirimaniko dakangaha ine Assam a·dokni tourism minister Pa Jayanta Mallabaruah, uni Twitter-o seatengon, songregipa manderang bang·anichi a·song gimiko niksengbatenggipa airport-rangoni Guwahati airport-ba 10-gipa gadango ong·engani gimin Assam a·dokna namen rasong chabeani ong·chongmota aro iako mikkangchi ra·doangkuna gita a·doko bilrang chu·onga gitan donga ine parakatan baksa, re·bagnigipa salrango Guwahati Airport-ko nambate aro apalbate taridapanirangchi Regional Tourism Hub-ona ra·doangna gita miksonge kamrangko ka·angnasiengani gimin AAHL-ni Deputy CEO, Sher Khan, ia seminar-o agan-talatanirangko ong·angaha ineba minister parakatjolaha.

Guwahati-o donggipa Lokpriya Gopinath Bordoloi International (LGBI) airport-o mongsongbate sin·karini somoio bangbang gita songre-songbatgiparang 39 percent-mangni gita bang·dapaniko nikna gita man·ahachim. Iani bidingo, Adani Group-controlled facility-ni talataniko on·angani gitade, gimik lak 28 songre-songbatgiparangoni, re·anggiparangan lak 14 mangni gita ong·a aro bangkirangara re·bagiparang ong·skaachim.

Iakoba poraie nina man·gen: Sorkarini project-rangko Baghmara MLA nianga