Shillong, June 9: Meghalaya a•dokni adhoc skulrango skigiparangni dormaharangko bariatchina dabienggipani bidingo a•dokni Cabinet chanchirimahaoba da•o dipet maming ja•kurangko de•na man•kujaenga ine Bristibar salo, Meghalaya a•dokni Chief Minister Conrad K Sangma parakataha.
Chief Minister-ni parakatani gitade, adhoc skigiparangni dormaharangko bariatna gita krorni kror tangkarangko nangenga aro ian sorkarina dal•begipa ra•biani ong•enga.
“Adhoc skulrango skigiparangni dormaharangko bariatgenchimode gipin department-rangna chamgimin tangka paisarangko chinga komiatskana nangao ga•akgen. Iani gimin chinga iani bidingo Cabinet gita chanchina nangao ga•akenga. Iako chinga dakbebegenchimode minister-rang aro gipin department-rangba budget-ko komiatani bidingo ma•siskana nanggen,” ine Sangma talataniko on•angaha.
Skigiparangni dormahako bariatanio adita krorrangkosan nangaigenchim ong•ode maming neng•nikani dongjawachim aro skigiparangna dormahako bariatna man•aigenchim ineba Chief Minister aganaha.
Adhoc skulrango skigiparangni dormahako bariatchina aro adhoc skigiparangba deficit-ni gadangona ra•doatchina gita Federation of All School Teachers of Meghalaya (FASTOM) sorkario dabiengachim ine nikna man•a.
