Tura, June 9: West Garo Hills a•jani Sadolpara songo bilsi 6000 ong•gipa mini rokomko ripingna gita Bristibar salo, Meghalaya a•dokni Health Minister James K Sangma-ni jakchi dingtangmancha seed-bank project-ko a•bachengate on•angaha.
Ia dingtangmanchagipa mini rokomko 2003 bilsio International Fund for Agricultural (IFAD)-sa nikchengahachim aro ia mini gimin uamang dingtangmancha jawilwatko tariaha, jekon jawilwat tarianio mingsing minggamako man•gipa Mira Nair, direct ka•ahachim.
Ia mini gimin mingsingatna gita jotton ka•ahaoba chu•sokgipa ong•na man•kujaengachim indiba adita salrangna skang, NESFAS aro ELP foundation, apsan nangrimenba, jolo songdongenggipa manderangni dakchakanichi ia mini gimin nambate ma•sie ra•na aro ia mini rokomko tang•doatna gita project-ko a•bachengataha.
Sadolpara songo ia bilsi 6000 ong•gipa mini rokomko ge•engkua aro ia miko songni me•chikrangan simsak nirokenggiparang ong•a. Songo miko ge•na aro chimonge rakkina me•chikrangan rokomko seoka aro miko me•asarang game, mi a•palkoba chalaiskaa.
Bristibar salo, ia miko ripinge rakkina gita seed-bank project-ko a•bachengate on•anganio James Sangma, jinmana aganprakengon, ia mini rokoman Garo Hills-ni mikkim rasong ong•engani gimin ia miko ripinge rakkina nangchongmota ine parakangaha.
Sadolpara-o kulienggipa seed-bank-oniko Garo Hills-ni gipin bakrango game ge•e cha•enggipa manderangba ia mini rokomko ra•angskaenba, game ge•e cha•na man•gen ineba Sangma aganaha.
Ia seed-bank project-ni bidingo NESFAS-ni Executive Director Piush Ranee, Hub News-na talataniko on•angengon, game ge•e man•gipa dingtang dingtang bosturangko tang•doatna uamangni dol kamko ka•enga ine parakataha.
