Tura, Apr 29: Meghalaya a•dokni dam 12 a•jarangon Central University Entrance Test (CUET) centre-rangko kulina gita Meghalaya sorkari, University Grants Commission (UGC) baksa agangrikataha ine Sukrobar salo, a•dokni Chief Minister Conrad K Sangma parakataha.
CUET porikkako sena gita form-rangko gapatani bon•kamgipa tarikara May 6 tarikon ong•engahani gimin ia porikkako serikna somoi gita form-rangko gapatchinaba ua chatro chatrirangko didiataha.
CUET porikkani bidingo UGC-ni u•iataniara rang•gitiksa ong•aha aro iana chatro chatrirang tarisamsoa dongkujani gimin ia bilsiode Meghalaya a•dokni chatro chatrirangna CUET-ko watkuchina gita a•dok sorkari mol•molataha ineba Chief Minister parakataha.
CUET porikkako ra•enggipa National Testing Agency (NTA)-ko Meghalaya a•dokna dingtangmancha tarikko ra•doatchina sorkari mol•molatahachim ine janapatengon, iana senge dongaigija May 6 tarikni gisepon ia porikkana form-rangko gapatskachina ua chatro chatrirangko didiataha.
Meghalaya a•doko pilak college-rangan NEHU-ni ning•o chalaienggiparangsa ong•ani gimin pilak chatro chatrirangkon CUET porikkako gisiko nange sechina gitaba Chief Minister didiataha.