Tura, Apr 29: Sukrobar salo, Meghalaya a•dokni Chief Minister Conrad K Sangma, North Tura-ni MLA Thomas A Sangma-ni dongpaanio, Tura A•konggre Secondary School-ni gital nokko nokdonggae on•angaha.
Ia skul nokko Asian Development Bank (ADB)-ni Supporting Human Capital Development in Meghalaya-ni dakchake on•anichi rikaha aro kamko Meghalaya sorkarini Education department jako ra•e ka•aha.
Ia skul noko classroom-rang baksana science lab, computer lab aro digital classroom-rangkoba donaha aro ia skul nokko rikanio gimik gong kror 1.47 koros ong•aha.
Ia skul nokko nokdonggae on•angani somoio a•dokni Chief Minister, jinmana aganprakangengon, lekka porani kamrangko a•dok sorkari mikkango done, bilsiantian chu•gimik gong kror 16000 state budget-oni gong kror 2700-mangko chamenga ine parakangaha.
Chu•gimik state budget-oni 20 percent-ko lekka porani kamrangna sorkari chamenga ineba Chief Minister, gisik ra•ataniko on•angaha.
Ia bilsini gisepo dam 2500 LP aro UP skulrangko taridapna, dam 70 LP aro UP skulrang, Govt secondary aro higher secondary skulrangko ra•dona gong kror 170-ko chamdapataha ineba Chief Minister aganaha.
A•dokni bi•sarang namgipa bida budiko man•china gita sorkari rakbee kamko ka•enga ineba Chief Minister parakataha.
