Shillong, Jan 18: Budbar salo, All India Trinamool Congress (AITC)-ni chairperson aro West Bengal-ni chief minister Mamata Banerjee-ni North Garo Hills-ona re•bae, manderangna ku•mikchetanggipa kattarangara da•o election-na dakmikanisan ong•aia aro ua manderangna lekkachi ba bostuchiba manderangna ku•mikchetaniko on•na man•jaha ine National People’s Party (NPP) matnangatskaaha.
AITC-ni ‘WE Card’ aro ‘MYE Card’-ko ‘bakki’ card ine matnangatengon, iandakgipa scheme-rangko Meghalaya a•doko ra•gatbebegenchimode, West Bengal a•doko gitan Meghalaya a•dokba gro-jinang donggipa a•doksa ong•aignok ine NPP parakataha.
NPP-ni u•iatani gitade, da•o Meghalaya a•dokni manderangna ku•mikchetenggipa ‘WE Card’ scheme-ara West Bengal sorkarini ra•gatgipa Lakshmi Bhandar scheme-sa ong•a aro ia scheme-ko ra•gatani a•selan West Bengal sorkari, 2022-23 bilsio mande sakprako gong 59,000-mangni gita gro nanggipa ong•ahachim.
“Iani a•selan West Bengal sorkari, an•tangni tangka ra•srogiparangna bilsio gong kror 80,000-oni gong kror 90,000-mangko sud baksa gamna nangenga aro West Bengal-ni mande sakantian bilsio gong 8000-ko gro gita gamna nangskaenga,” ine NPP parakataha.
AITC-ni iandake tol•e ku•mikchetanirangko bebera•jachina a•dokni manderangko didiatengon, iandakgipa scheme-ko ra•gatani a•selan West Bengal sorkari, 2022 bilsini March 31 tariko gong kror lak 5.28-oni da•o gong kror lak 5.96 gro gapna siengaha ine NPP parakataha.
“West Bengal a•dokon indita grorang dongenga ong•ode bani tangkachi ia scheme-rangko Meghalaya a•dokona ra•bana miksongenga,” ine NPP sing•doataha.
NPP-ni ning•o Meghalaya a•doko namroro silroroaniko ra•baani gimin janapatskaengon, batanggimin bilsi bongani gisepo game ge•e cha•giparangna aro producer group-rangna FOCUS aro FOCUS+ scheme-rangko a•bachengatanian ia sorkarini nambatgipa dakmesokani ong•aha maina ia scheme-ni ning•o lak 4.5-na baten game ge•e cha•giparang namgniko man•aha ine NPP parakataha.
“Ia FOCUS aro FOCUS+ scheme-ni ning•o game ge•e cha•enggipa nokdangrangna gong 10,000 tangkarangko on•enga aro Youth Empowerment through Youth Empowered Organisation (YESS)-ni gitaba sorkari, chadamberangna janggi tangani cholrangko on•na jotton ka•enga. YESS program-ni ning•o chadambe dolrangna, gong lak 1-ona kingking dakchakaniko on•anichi dingtang dingtang kamrangko namdapatna man•enga,” ine NPP parakataha.
