Dibrugarh, Oct 18: Anglo-Kuki War (1917-1919), jekon Kuki Revolt ba Kuki Uprising ine u·itokachim, uni bilsi 108 gapaniko maniani bak gita, Assam Kuki College Professors’ Association (ASKCOPA) dol, Karbi Anglong-ni Kuki Students’ Organisation (KSO) baksa apsan nangrimenba, “Rekindling the Spirit Of the Anglo-Kuki War : Inspiring Unity, Identity and a Shared Destiny” ine katta bichongo pangchake online agangrikaniko ong·atangaha.
Ia online tom·bimonganio professor-rang, am·sandigiparang, jatni dilgiparang, doctor-rang aro Assam-ni pilak u·i-ma·sigiparangko tom·batokna dakchakaha aro ia tom·bimonganiko Tinsukia College-o Econimic-ni Assistant Professor ong·enggipa Dr. Paominthang Haokip dakdilangaha. Ia session-ko git ring·anina mingsing minggamako man·gipa Zubeen sagiko gisik ra·e mande ra·ani baksana Rev. Dr. Sehjalam Doungel-ni bi·anichi a·bachengataha. ASKCOPA-ni President aro Dibrugarh D.H.S.K College-ni Head of Political Science Dr. Lamkholal Doungel, ia online tom·bimonganiko Anglo-Kuki War-ni somoio ku·cholsan ong·ani aro ka·donganiko mesokgipa manderangna mande ra·pilskaaniko dakan baksana jatni bang·a manderangko bilakbatatna, ku·cholsan ong·atna aro iarangoniko skie ra·atna miksonganio ong·atangaha inenba rimchaksoani kattarangko aganangaha.
Ia online tom·bimonganio mongsonggipa jinmana aganprakaniko dakdilgiparangara Manipur Presidency College-ni Dr. Hoipi Haokip baksana Kuki Inpi Assam-ni Pu L. Doungel aro Pu Thanglun Changsan ong·a.
Dr. Hoipi Haokip, Anglo-Kuki War-o me·chikrangni gamchatgipa on·gilanirang, chong·motan maikai uamang cha·ani aro slai gulirangko ra·bitachim, maidake uamang kobor ra·timgiparangni kamko ka·an baksana British-rangni jakchi me·asarangko pattok ning·o donatani somoio maikai uamang dilgiparang (Haosapi) ong·baahachim uarangni bidingo agan-talate on·angaha. Iani gisepon, ua me·chikrangni rake kamko ka·ani baksana nokdango aro songsalo uamangni gamchatgipa ong·aniko manigipa Chang-ai ritual-ni bidingo janapataha.
Pu L. Doungel, Kuki matgrikrang jekai Pu Chengjapao aro Pu Tintong-ni ka·dongani gimin aganenba, sakantikon ku·cholsan ong·e dongchina aro chadamberangko skia poraia man·atani aro bil gnangbatatanina gisikko on·china didiataha.
Pu Thanglun Changsan, Kuki manderangni man·enggipa neng·nikanirang jekai a·a chiatangko aro an·tangni chong·mot ong·aniko gimaatani bidingo aganangaha. Iani gisepon ua jattangko an·tangtangni ma·ambiko gamchate ra·china, an·tangari sason ka·anirangko ra·dochina aganan baksana sorkario agre pangchakaniko dakgija an·tangtangni bilo pangchakchina u·iataha.
KSO Karbi Anglong-ni President Pu Liengin Singson-ni mitelpilani kattarang baksana Assam KSO-ni gitcham Advisor aro President Pu Z. Lutthang Thangeo-ni bi·anichi ia online tom·bimonganiko matchotataha.
Na·simang iakoba nina man·gen:
Na·simang iakoba poraina man·gen: Arunachal Pradesh-o ong·telaigipa biaprangko ripinggipa Kaimoi song
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
