Imphal, May 05: Manipur-o songdongpagipa Meitei ba Meetai jatkoba a·dokni Scheduled Tribe (ST)-o chapatna am·aniko jegale Tribal dolrangni jingjengatanio golmalrang ong·anganichi a·doko so·so-jengjeng ong·anirangko tom·tomatna a·dok sorkarini ja·kurangko de·e kamrangko ka·atengani gisepo, ia obostachi neng·nikaniko man·enggipa manderangna dakchakanirangko on·na aro uamangko naljoka biapona rimongkatna gita Indian Army aro Assam Rifles-ni sipairang dondikgijan kamrangko ka·enganiko nikna man·enga.
Ia tanggitik ong·gipa obostachi dingtang dingtang neng·nikaniko man·enggipa sak 11500 manderangko sipairang, biaptangtango nokchakan baksana nanggipa bosturangkoba uamangna on·e dakchakenga ine knasona gita man·enga.
Obosta ong·aoni adita salrangna dondikgija kamrangko ka·e, Assam Rifles aro Indian Army-ni sipairang bang·a nokdangrangkon naljoka biapona rimongkatbaaha aro Manipur a·doko so·so-jengjeng ong·aniko tom·tomatna miksonge kamrangko ka·enganichi sipairang, pilak neng·nikaniko man·enggipa manderangko rimongkatna aro golmal ong·anio mata-bu·a man·giparangna nirok-simsakanirangko on·anioba gisiko nangen kamrangko ka·enganikoba nikna gita man·enga.
Indake ong·engon, Paramilitary sipai dolrang (RAF, CRPF, BSF)-ko so·so-jengjeng ong·enggipa Manipur a·dokona dol 14 company-rangko ma·mong sorkari watdapataha aro gipinrangba sokbadapkugen ine koboro parakataha.
Jingjengatgiparangoni mitam manderangni, a·jaoni ge 7 ba 8 police post-rangoniko seke ra·anggipa silchidarerangko bakbakan walpilchina gita manderangko didiangengon, maming a·sel gri silchidareko walpilgipa manderangko jakgitel watna ku·rachakaniko on·angan baksa walpilgijagipa manderangni kosako niam gita rakgipa ja·kurangko de·atna gita mikrakatanikoba ong·angjolaha.
