Guwahati, March 1: Ia chang Assam a•dokni Assembly election-o a•doktangko warachakna gitasa dilgiparangko seokanio bak ra•china Congress dolni dilgipa Priyanka Gandhi, Assam-ni chadamberangko didiangaha.
Priyanka Gandhi, Congress dolni tom•bimonganirango bakko ra•pana gita salgnina Assam a•dokona re•baaha aro da•al salni bako ua Assam a•dokni Lakhimpur-o aganprakengon, Assam a•dokko jokatna gita dilgiparangko seokchina chadamberangko didiangaha.
“Ia chang Assemly election-o Assam a•dokko chel•chakna gita chadamberang dilgiparangko seokbo,” ine Congress dolni dilgipa Priyanka Gandhi aganaha.
Gandhi-ni aganani gitade, Assam a•dokni chadamberang, ‘an•tangtangko chel•chakna’ gitasa dilgiparangko seokanio bakko ra•pana nangenga.
“Chadamberang an•tangtangni namgnina chanchiani somoi ong•engaha,” ineba Priyanka Gandhi aganaha.
BJP dolko matnange aganangengon, ma•mongo aro Assam a•dokoba BJP sorkari, pilakni gitan an•tangtangni ku•rachakanirangko chu•sokatna man•jaha ine Congress dolni dilgipa Priyanka Gandhi parakataha.
“Sorkari bang•bea kamrangko manderangna ku•mikchetahachim indiba mamingkon chu•sokatna man•jaha,” ine Gandhi aganaha.
Ia chang Assam Assembly election-o Congress dol baksa bakrimenggipa ‘Grand Alliance’ chegipa ong•gen ine an•tangni ka•dongchakenganiko parakatengon, ia changode Assam-o dingtanganiko nikna man•telgnok ine Congress dolni dilgipa Priyanka Gandhi parakataha.
