Shillong, March 01: A·dokni LP school-rango contractual-o skie on·enggiparangko kam bon·atna am·engani bidingo sorkarini iandakgipa chanchie ra·baaniko jegalenba Khasi, Jaintia aro Ri-Bhoi district-rangni lower primary skulrango contract-o skie on·enggiparang Meghalaya Govt LP Contractual Teachers Association-ni bimango ku·cholsan ong·e a·dokni skotong songjinma Shillong-o Sombar salo sima-gri okgimu chake jingjengataha.
Janapjolna gita, contractual-o skie on·enggiparangni kamko bon·atna gita Meghalaya sorkarini tik ka·aniara mija bilsi February jani 25 tariko Meghalaya Teachers Eligibility Test (MTET) porikkani result-rangko parakatani ja·man ong·ahachim.
Baditaba bilsirangna kingking a·dokni bi·sarangko dal·at-chuatna an·tangtangko on·kange skie on·bagenchimoba, MTET porikkao chu·sokgiparangkosa sorkari kamo rakkiangkue chu·sokgijagiparangni kamrangko bon·atna am·ani koborrangkoba knasona gita man·skaenga.
Skigiparangni sima dongija okgimu chake jingjengataniko a·dokni skotong Shillong, Malki-ni kal·chakram biapo Sombar salo ong·ataha. Unomiting, saksa contractual-o skie on·enggipa Bisuli Sangma indine aganaha, “Indita bilsirangna skie on·ani a·bao dangdike on·bagipa ong·genchimoba aro D.El.Ed -ko matchote dakmangimin ong·oba, MTET porikkao chu·sokgipa ong·pajahani gimino gipinrang gitan uaba kam bon·atako man·na jajrengsoenga” ine parakaha.
