Shillong, Jan 13: Assam aro Meghalaya a•dokni simarango meligrikgijaniko a•dok sorkari, re•baenggipa January 21 tariko Meghalaya a•dokni bilsi 50 gapaniko manina skangan namatna nangnikenga ine Bristibar salo, Meghalaya a•dokni Deputy Chief Minister Prestone Tynsong parakataha.
“January-ni 21 tariko an•ching a•dokni bilsi 50 gapaniko manina siengani gimin iana skangan chinga sorkarini gita a•dok damgnini gisepo meligrikgijaniko namatna nangnikenga,” ine Tynsong, kobor ra•timgiparangna aganaha.
A•dok damgnini simarango meligrikna man•jaenggipa biaprangoni damdok biaprangko namatchengna gita ja•kuko de•anio a•dok damgnini chief minister-rang, Budbar salo brigipa changna Guwahati songjinmao apsan asonge agangrikangahachim ine nikna man•a.
A•dok damgnini chu•gimik report-rangko man•ahaon Meghalaya a•dokni Chief Minister Conrad K Sangma aro Assam-ni Chief Minister Himanta Biswa Sarma, asonge chanchirimangtaigen ineba Tynsong parakataha.
Deputy Chief Minister-ni parakatani gitade, Budbar salo chief minister sakgnini tom•e chanchirimanio, chu•gimik report-rangko tarie salgittamni gisepon an•tangtangni chief minister-rangna on•china gita sorkaritangtangna ge•etaniko on•angtaiaha.
Report-rangko man•ahaon a•dok damgnini chief minister-rang, bon•kamgipa changna gronggrike agangrikangtaigen aro uni ja•man uamang sakgnian, Union Home Minister Amit Shah-na talataniko on•na gita Delhi-ona re•anggnok ineba Tynsong parakataha.
