Guwahati, Jan 13: Mande gatruragipa Guwahati Express relgari jean Bikaneroni New Jalpaiguriona re•baengachim da•al salo Moinaguria aro New Domohanini gisepgriko da•al attam 5 bajimangna skang a•sel ong•aha. Ia rel gari mijal Bikaneroni re•bae da•al attam Guwahationa sokbana nangahachim. Rasong gribee ia a•sel ong•anio sakgittam manderang siangaha aro bang•a manderangan biljimbee mata-bu•ako man•tokaha. New Jalpaigurini rescue teamrang uamangko dakchakna ta•raken biapona reangha aro saknaa man•giparangko ta•raken Jalpaiguri hospitalona ra•angtokaha.Koborko man•soani gitade sak 40 manderangko ua biaponiko naljokatna man•aha, sak 24 manderangko Jalpaiguri hospitalona rimangaha aro sak 16 saknaa man•giparangko Moinaguri Govt. hospitalona watataha.