Tura, Feb 3: Assam a•dokni gue badinggipa mande saksa re•anggipa Mongolbar salonin South Garo Hills a•jao gimaengani gimin uko rim•gittangakon ine police-rang chanchichipenga.

Police-rangni u•iatani gitade, Assam South Salmara a•jani Mankachar jolo gue badinge cha•enggipa Nur Muhhamad, South Garo Hills a•jao gue ge•e cha•enggipa manderangoniko gue brena gita an•tangni Mahindra Pik-up gario re•baahachim. Mongolbar salo ua Baghmara-oni Siju rama gita Karukol songona re•angengmiting somoio an•tangni gari baksa gimaaha.

Ia mandeko Karukol-ona gue brena re•angengmiting somoion bon•kame Baghmara-o nikrikaha ineba police-rang kobor on•aha.

Ia mandeni gimaani ja•mano police-rang, ia mandeko aro uni gariko sandina a•bachengengaha ine police official-rang u•iataha.