Assam, May 24: Assamni Halflong jolo mikka jimbee waanichi bang•a nok-jamranga nosto ong•atako man•a baksana rama-sorokrang be•rurutoke nosto ong•tokaha. Assam skotong minister Hemanta Biswa Sharma Halflong jolni nosto ong•atko man•gipa biaprangona mongolbar salo re•ange Halflong LP skulo donggipa relief campona re•angjolaha. Sak 17 manderang chi banao an•tangtangni nokko gimaate ia campo dongtokengachim.
Hokai Punchi songo a•a be•grue sakgittam manderang janggitangtangko gimaatako man•e duko ga•akenggipa nokni manderangko skotong minister grongjolbaaha aro uamangna dakchakaniko on•a aro nokrangko rikpiltaie on•a ku•rachakbaaha. Uni ja•mano Halflongni circuit houseo Dima Hasao District Councilni MDC, MLA, DC, SP aro gipin officer rang baksa tom•e chanchigrikangaha.
Nosto ong•gimin nok-jam, rama-jal•angrangko taripiltaina ma•mong sorkarioni sandina re•bagen. Engineer dolrang dolong rama-jal•angrangko rikpiltaiani bidingo niroke kam ka•taignok. Nosto ong•giminrangko rikpiltaina Dima Hasao District councilna sorkari tangkarangko chamatgnok ine kobor ra•timgiparangna Hemanta Biswa Sharma aganaha. North Cachar Hills Autonomous Councilnaba ma•mong sorkari aro a•dok sorkari dakchakatna sienga ineba ua aganaha.
