Nongpoh, Oct 9 : A·songni economy ba tangka-paisani gadangko mikkangchi tang·doatskana gita India-ni salgro-salaram a·jarango chu·ongen bilrang donga ine Ports, Shipping & Waterways aro AYUSH-ni ma·mongni minister Pa Sarbananda Sonowal mija Sonibar salo aganangaha.

A·jao dingtang dingtang rokomni sam-bolrang gnang baksana man·rikrikbagipa jatni bewalo sana-bananiko dakani samrango namen man·e cha·gipa ong·e a·jao AYUSH-o pangchake karkanarangko tang·doatna gita namgipa cholrang gnang ine minister aganaha.North Eastern Institute of Ayurveda & Homeopathy (NEIAH)ni bidingo nipiltaiani tom·aniko mija Sonibar salo Ri-Bhoi district-ni Umiam-o ong·atanggipao bakko ra·e aganangengon, salgro-salaram a·jani economy-ko tang·doatna gita dakchakanirangko on·e iani gita mikkangchi a·songni economy-ko tang·doatskana nangnike, ma·mong sorkari on·kange kamko ka·atenga ineba Pa Sonowal parakataha.

Unomiting, salgro-salaram a·jani pilak chatro-chatrirangna namgipa gadango lekka-porako on·na gita nangengani gimin kobor setimgiparangna aganananio, Ayurveda nursing and pharmacy aroba Panch Karma Therapy-o professional short term course-rangko salgro-salaram a·jana nambate on·na gita nangenga jedakode a·jatangni aroba a·songni gipin bakrangoni chatro-chatrirang iandakgipani gimin skie ra·anirangko dakna man·gen ine ma·mongni minister aganangaha.

Ua somoio, uni ministry-oni chubatgipa gadangni officialrang baksa NEIAH-ni bidingo tom·e nipiltaianiko dakanganio, AYUSH-ni gita a·bachengatenggipa kamrangko chu·sokgipa ong·atna sorkarini dingtang dingtang ja·kurangko de·atenganikoba ma·mongni minister niangaha aro namdapatna nangenggipao adita agan-ku·pattianirangko ua on·angjolaha.