Shillong, Jan 20: India-ni do·o-matrang, burung-bolgrimrangni gimaangroroenganichi, karirangni dingtangrorobaanichi aro mande aro matburungni gisepo meligrikgijanirangchi sinjetanirangko man·engon, South Garo Hills-ni Baghmara-o salsana specialized training programme-ko ong·atangaha jeon forest official-rang, scientistrang, police aro uandakgipa dolrang aro songni manderang re·bae bak ra·angaha.
Ia training-ara, “Monitoring of Threatened Mammalian Fauna of the Indian Himalayan Region (IHR)” ong·a, aro iako Zoological Survey of India (ZSI), Kolkata, Meghalaya Forest Department baksa bakrime ong·atangaha aro uko MFC Hall, DC Office, Baghmara-o sokachakaha.
Ia programme-o frontline staff, chatro-chatrirang aro songni-nokni dingtang dingtang dolrangna scientific bosturangko jakkalna, aro Himalaya aro uni sepangjolo donggipa biaprango gimaangenggipa matbururngrangko nirokna changa-sapanirangko skie on·anichi uarangko ripinganirangko bilakbatatna miksongenga.
Ia progamme-ni mongsonggipa bak ge·sara South Garo Hills-oniko am·sandie bang·a ma·malrangni matburungrangni donganiko Balpakram National Park aro songni rakkigipa burungrango donga nikna man·aniko parakatanian ong·a. Camera-ko done nianiko dakon, uarangoni 60% matburungrangde gipin matburungrangko cha·giparang ong·a ine nikna man·aha, aro ian samtangtangna namen namgni ong·a ine u·ina man·aha.
Uandake, Meghalaya-o, mongsongbate South Garo Hills-o namedake rakkigimin burungrang aro songni manderangni rakkigipa burungrang do·o-matrangko ripingna namen gamchatbea ine u·ina man·aha.
Tom·ani a·bachengao Chief Conservator of Forests (Wildlie & Territorial), M.J.A. Sangma mongsonggipa sokgipa ong·e re·baaha aro Balpakram National Park-ni Director, Nazia Marak-ba dingtangmancha okamatako man·e re·baaha.
Uandake matburungrangko ripingna kam ka·anio scientific bewalrangko jakkalna aro sakkirango pangchake rairangko ra·ani gamchataniko aganenba, burungo donge kam ka·gipa forest staff aro songni-nokni manderangni do·o-matrang aro burung-bolgrimrangko ripinganio nangchongmotgipa dakchakaniko nanga ine aganangaha. Do·o-matrangko ripinganio dingtangmancha dakbewalrangko aro manderangni bak ra·aniko nanga ine ku·mongrimenba, sorkarini dolrang aro am·sandianirangko dakgipa dolrangni bakrimanichi Meghalaya-o bang·begipa rokomari gam-jinrangko ripingna nanga ine ua aganangaha.
“Bang·a ma·malrangan uarangni dongchakramni komiroroanichi, karirangni dingtangroroanichi aro manderangoni sinjetanirangko man·roroanirangchi komiangroroangengaha ine ZSI, Kolkata-ni Scientist-C aro Training Coordinator Dr Bheem Dutt Joshi aganangaha.
Uandake technical session-rango gital chasongo ma·malrangko nirokani bewalrangko skie on·angaha jekai camera trapping, trail survey-rang, GPS mapping aro vegetation sampling. Dr. Amira Sharief ia bosturangko jakkalani bidingo talatchenganiko dakangaha. Dr. Arundeep Singha mande aro matburungrangni gisepo nanggrikani, uarangni a·selrang aro uarangko champenganirangni gimin agane on·angaha.
Bak ra·giparang matburungrangni bidingo sandianirangko namdapatna aro ru·uta somoirangna matburungrang, aro burung-bolgrimrangni gimin am·sandianirangko dakna camera trap-rang GPS-rang aro dingtang dingtang survey ka·ani cholrangko jakkale nie skianirangko man·aha.
Ia programme-o Forest Department, Police, BSF, NGO-rang aro skie ra·chakram biaprangoni manderang, songni-nokni dilgiparang arp Captain Williamson Memorial Government College, Baghmara-oni Environmental Science-ko poraigipa chatro-chatrirang, chu·gimik sak 50-na baten manderang re·bae bak ra·angaha.
Uandake ru·uta somoirangna matburungrangko ripingani, genetics-o pangchake am·sandianirangko dakani aro biaprangni kri sandianirangko dake matburungrangni re·ramaniko ma·sie ra·ani, bang·a-bang·gijako u·iani aro karirangko chaktoaniko u·ie ra·ani bidingo pilak skigiparang talate on·angaha.
Bon·kame jinma tom·aniko dake, certificate-rangko sualatenba, scientist-rang, sorkarini dolrang aro songni-nokni manderangni gisepo damsan bakrimanirangko bilaktbatate Meghalaya-ni aro India-ni Himalaya jolni ma·malrangko naljoke rakkina ku·mikchetanirangko dakangaha.
Na·simang iakoba nina man·gen:
Na·simang iakoba poraina man·gen: Tura-o Meghalaya Day-ko maniani bak gita noksa salsusaaniko ong•ata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
