Shillong, March 22: Shillong songjinmao garirangni ramarango apchangket ong·aniko komiatna gita Sustainable Transport & Efficient Mobility Society (STEMS) program-ko a·bachengatahaoba, bang·bata skulrangan ia program-ni skul bus-rangko chalaina neng·niktokenga ine Budbar salo, Budget Session-ni question hour-o Meghalaya a·dokni Chief Minister Conrad K Sangma parakataha.

Chief Minister-ni parakatani gitade, skul bi·sarangko salrurana gita STEMS program-ko a·bachengatanichi Shillong songjinmao garirangni apchangket ong·aniko komiatna man·gnok ine ka·dongengachim indiba bang·bata skulrangan ia skul bus garirangko chalaina neng·nikaniko paraktokskaengachim.

Skul bus garirangko chalaina gita skulrang jechaktokani ja·man sorkari, tom·anirangko aro survey-rangko ka·on, ia program-ko sorkario register ka·gipa society ba dolrangna pakwate a·bachengatna nangnikaha ineba Chief Minister parakataha.

Sorkario register ka·gimin society-rangna pakwatanio kamrang chu·sokjaenga ine nikgenchimode ia program-ni bus garirangko chalaina sikenggipa skulrangna pakwate on·skana cholrangko nigen ineba Sangma parakataha.

Indake ong·engon, ia skul bus-rangko chalaina gita dam 15 skulrangde, sorkari baksa MoU-o soi ka·aha aro ia skulrangara, Laitumkhrah-Dhanketi jolrango donggipa skulrang ong·a ineba Chief Minister parakataha.

Shillong songjinmao garirangni apchangket ong·aniko komiatna nangengani gimin janapatengon, komibeoba sak 27,000 chatro chatrirang, Laitumkhrah-Dhanketi jolrango donggipa skulrango napenga aro ianoni 60 percent-de an·tangtangni garirango re·batokengani a·sel ramarango apchangket ong·ani bilongbatenga ine Chief Minister parakataha.