Guwahati, Jan 22: Bangladesh a•songoni matchu badingsrukgipa mandeko Sonibar pringo, Assam police-rang, Mankachar a•jani Kutir songoniko rim•na man•aha.
Rim•ako man•gipa mandeara Bangladesh a•songo donggipa Kurigram a•jani bilsi 45 ong•gipa Habibur Rahaman ong•achim ine ma•sina man•aha.
Police-rangni u•iatani gitade, ia matchu badingsrukgipa mande, re•anggipa January 20 tarik walni 11:45 bajimango, Kuchinamara song gita India a•songona napsrukbaahachim.
Ia mande, India a•songona napbaani ja•man Kutir songni saksa Seikh Alam minggipa mandeni noko ma•chakahachim aro ia mande ru•uta somoirangonin iandake matchurangko niam gri badingangengachim ineba police-rang u•iataha.
