Guwahati, Jan 22: Jaminna bi•aniko Gauhati High Court jegalatani ja•man, Padma Shri man•gipa Uddhab Bharali-ko, uni me•chik bi•sako drae til•ekani bidingo judicial custody-o donataha.

Bilsi 59 ong•gipa Bharali, me•chik bi•sa saksako drae til•ekahani gimin uni kosako police-rang, POCSO Act-ni ning•o mokordoma ka•ahachim aro uandaken ua Sukrobar salo, Assam a•dokni Lakhimpur-o donggipa Chief Judicial Magistrate-ni kachario an•tangko bame on•eani ja•man jaminna bi•ahachim.

Indake ong•genchimoba, Bharali-ni jaminna bi•aniko Lakhimpur-ni CJM jegalatenba, uko sal 14-na judicial custody ning•o donataha.

Indake ong•engon, an•tangko kosako matnanganirangko Bharali jegalatskaaha aro kakket bichalna dakgrikangkugen ine parakatskaaha.

Uddhab Bharali, an•tangni kamrangma 2019 bilsio Padma Shri award-ko man•ahachim.