Tura, Feb 8: Mija anti Sonibar walo East Garo Hills, Williamnagar-ni Nokil A·we gittim joloniko bike-rangko cha·ue ra·angenggipa sakbri manderangko South Garo Hills a·jani police-rang mijal Robibar pringo Baghmara-o rim·aha.
Koborna u·iatani gita, ua manderang dingtang dingtang biaprangoniko bike-rangko cha·ueming songsul a·song Bangladesh-ni sima-ari jolo palatna gita ra·angengachim, indiba South Garo Hills a·jani police-rang uamangni gimin ning·joljol koborrangko man·soe ua cha·ue ra·angenggipa bike-rangko rim·sona man·aha.
Rim·a man·gipa sakbri manderangara Mendipathar songoni Chusrang R. Marak, Dainadubi songoni Bapudup Rabha, Damra Tengasot-oni Bolong G. Momin aro Rongara Bolgisi Gittim-oni Wonder N. Marak ine ma·sina man·aha.
“Chinga bike cha·ue ra·angenga ine koborko man·soahani gimin bike cha·ue ra·baenggiparangko rim·na sengsoaha, indake bike bolgni baksana uko cha·ue ra·baenggipa manderangkoba Robibar pringo rim·aha. Rim·a man·gipa sakbrikon da·o Williamnagar police-na pakwatataha,” ine Baghmara police koborna u·iataha.
