Tura, Jan 20: Re.anggipa 2020 bilsio Assam Got Talent, Session 5-o susae gnigipa boksisko man·gipa West Garo Hills a·jani Bhaitbari, Phulbari jolo dongipa Nayagaon songni bilsi 8 ong·gipa me·chik bi·sa Begum Alisha Islam, “International Nrityahree Award, 2021”-na seokako man·aha.
Ua bilsi chonaonin gisiko nangbee jotton ka·e chu·sokanina T-Series Music Company 25% percent scholarship-ko uni mikkangchi poraianina dakchakgen ine parakataha.
Ua da·o Goalpara-ni Rising Dance Academyo Sankar Kalitha Guru ni ning·o skie ra·aniko dakenga ine uni pagipa Azizul Islam parakataha.
Uni chu·sokgipa ong·anina West Garo Hills-ni Deputy Commissioner Pa. Ram Singh uko de·mitele uni mikkangchi susaanirango chu·sokgipa ong·china an·tangni nama sikaniko on·ataha.
