Shillong, July 27: Meghalaya a•doko BJP-ni sakgipin MLA Sanbor Shullai-ko Mongolbar attamo, a•dokni gital Cabinet Minister ong•e, a•dokni Governor Satya Pal Malik-ni dilanichi ku•mikchetataha.
Meghalaya a•dokni Chief Minister Conrad K Sangma-ni u•iatani gitade, da•o dipet Shullai-na on•na sienggipa portfolio-rangko ua name ma•sikujaenga aro ua salsa salgnini gisepon iani bidingo Cabinet baksa chanchirimanggen.
BJP-ni state president Ernest Mawrie-ni seatgipa chittiko man•soani ja•man BJP-ni sakgipin MLA Sanbor Shullai-ko Cabinet-o rimnapskana tik ka•angaha ineba Sangma parakataha.
Chief Minister-ni parakatani gitade, MDA sorkariko songchengani somoion MDA-o bakrimenggipa dolrang, an•tangtangna Cabinet-o tikatgimin biaprangko sualgrike ra•na tik ka•manahachim aro uandaken BJP dolba, Cabinet-ni biapko MLA sakgnini gisepo sualgrike ra•aha.
Re•anggipa bilsini October jaoba Cabinet-ko sualpiltaiani somoio HSPDP-ni Minister Samlin Malngiang-ni biapo sakgipin MLA aro da•o PHE Minister ong•enggipa Renikton Tongkhar, Cabinet-o biapko man•rikskaahachim. Apsan daken, NPP-ni MLA aro gitcham fisheries minister-ni biapo Dasakhiat Lamare, biapko man•rikskaahachim.
Da•o dipet iani bidingo BJP-ni MLA AL Hek, maming kattarangko aganchaka dongkujaengachim.
Kobor on•timgiparangni u•iatani gitade, uni biapko sakgipin MLA-na on•skaahani gimin Hek suk ong•jaha aro uandaken Shullai-ni ku•mikchetanionaba re•bajahachim.
Indake ong•engon, Cabinet-o rimnapako man•gipa Shullai-de an•tangni kusi ong•aniko parakatskaaha aro ian ma•mongo BJP high command-ni ge•etani gitasa ong•ani gimin iako manina nangaia ine parakataha.
Portfolio-ko man•ani ja•man uni skanggipa daitoara mai ong•gen ine sing•on, skango uni kam ka•a gitan ua songsalni manderangna dangdike on•angkugen ine Shullai parakataha.
