Shillong, Mar 8: Assam aro Meghalaya a•dokni simarango meligrikgijanichi Block-I jolrango ong•enggipa obostarangko namatna gita, da•o gipin damdok jolrangko namatskana a•dok damgnini agangriktaianio jako ra•angskagen ine Mongolbar salo, Meghalaya a•dokni Chief Minister Conrad K Sangma parakataha.
Assembly-o Mookaiaw-ni UDP MLA Nujorki Sungoh-ni sing•anina ua ia kattarangko aganaha.
A•dok damgnini simarango namroro silroroani kamrangko ra•gatani giminba Deputy Commissioner/Superintendent of Police Border Coordination Committee-ni gita Assam-ni DC aro SP-rang baksa tom•anirango chanchirimaha ineba Chief Minister parakataha.
Meligrikna man•jaenggipa biaprango so•sojengjeng ong•anirangko nikna man•rongenggipani bidingo janapatengon, ia jolrango tom•tomaniko rakkiangna a•dok damgnian agangrikjringgen aro maiba kamrangko ka•na nanggenchimoba dolsa dolgipinna u•iatgrikchenggen ine Sangma aganaha.
Meghalaya a•dok ning•o ka•enggipa kamrangko Assam sorkarini gita champengrongani gimin janapatengon, iani bidingo Meghalaya a•dokni Chief Secretary, Assam-ni Chief Secretary-na sedoate, kamrangko champengjachina didiataha ine Chief Minister parakataha.
Meghalaya aro Assam a•dokni sima jolrango songdongenggipa manderangna naljokaniko on•na man•na gita Meghalaya a•dokni police-rang, so•sojengjeng ong•enggipa biaprangko re•roroe nirokjringenga ineba Chief Minister aganaha.
