Shillong, Oct 19: Catholic giljani bilsi 100 gapaniko gisik ra·e “Centenary”-ko maniani bon·kamgipa salo manianiko re·baenggipa October 30 tariko dakanggen ine Shillong-ni Archdiocese, Butbar salo u·iatangaha.
India-ni salgro-salaram a·jolo Catholic giljako a·bachengatani bilsi 100 gapo Salesian charism-ni sokbaaniko uamang ru·utbea somoirangonin nisengsotokengachim ine Archbishop Victor Lyngdoh u·iataha.
Uni gimin Laitumkhrah, Cathedral of Mary Help of Christians-ni Calvary-o ong·nasienggipa programo sakanti nama-sikaniko on·giparang, ripengskarang, bebera·rimskarang, toromni dilgiparang, pamongrang gimikkon re·bae bakko ra·etokpachina mol·molata ineba Archbishop u·iatjolaha.
Ia manianio, Holy Mass-ko India-ni Nuncio, Most Rev. Leopoldo Girelli-chi dakdilanggen jeon Salesian Congregation-ni Rector Major-ba programo bakko ra·angpagen.
Indake ong·engon, sajinmani a·sel bilsi-gni changani ja·man bilsianti ong·atronggipa Eucharistic Procession-ko ianpakode November 13 tariko ong·atgen ineba Archbishop janapatjolaha.
