Boko, Dec 29: Assam-ni Kamrup a•jani nitogipa Chandubi Lake-o January 1, 2026-oni a•bachenge chang 16-gipa Chandubi Festival-ko ong•atanggen, jeon salbongana kingking jatni dakbewalrang, ma•ambioni cha•baenggipa cha•ani-ringanirang, jatni chrok-mesaanirang aro dingtang dingtang manianirangko dakanggen.
Ia manianiko South Kamrup-ni Rabha Hasong Autonomous Council jolni Borduar-Bholagaon Regional Rabha Students’ Union aro Chandubi Festival Celebration Committee bakrime ong•atenga, aro ian a•doko songo-noko manianirangko ong•atgiparangoni mingsingbatgipa mingsa ong•baaha.
Ia manianiko 2010 bilsioni dipetan bilsianti “Save Chandubi, Save Heritage” ine pangchakaniko done manibaenga aro iano ong•telaigioa samtangtangrangko ripingani baksana jatni dakbewalrangko tangchaatpilna bilaken ja•ku de•anikoba dakenga.
Chandubi Festival sorkari-oni namedake ra•chakaniko man•kujagenchimoba, ia maniani ka•sine ka•sine dal•roroenba India-ni dingtang dingtang biaprangoni aro a•palchini bang•a manderang, artist-rang aro researcher-rangba re•barongenga.
“Guest house, napani rama, main cultural stage, aro exhibition stall-rangko December 31 tarikna skang matchotatna kamrangko ka•enga. Ia manianiko namedake ong•atna jean an•chingni jatni dakbewalrangni su•uani aro ong•telaigipa samtangtangna ka•saaniko mesoanian chingni miksongani ong•a,” ine Festical Committee-ni Vice President Pranjal Rabha parakataha.
Manianiko ong•atgiparangni aganani gitade, ia manianirangchi Rabha aro gipin ma•ambioni ong•bagupa jatrangni dakbewalrangko ripingna, rural aro eco-tourism-ko gipatna aro 1897 bilsio Assam-o banggriaoni ong•bagipa Chandubi Lake-ko ripingna ine miksongenga.
2026 bilsio maniani gnigipa salo mingsinggipa git ring•gipa Zubeen Garg sagiko dingtangmancha mande ra•aniko dakanggen. Uko gisik ra•na cultural rally-ko ong•ata baksana Chandubi-o Tongighar-koba tarikamgen. Zubeen sagini Chandubi-o jawilwat tariani somoirango biapon waltuanirangko gisik ra•na ine ia tarianirangko dakenga.
Una mande ra•e re•jomaniona bang•a manderang re•bae bak ra•anggen aro iani maniani mongsonggipa bakrangoni mingsa ong•gen ine ka•dongsoenga.
Biapni ong•telaigipa nitoanirang, dingtang dingtang jatrangni bakrimani aro bang•a manderangni bak ra•anichi, Chandubi Festival 2026 ia biapko Assam-ni mikkimko ripingani aro pangkamgipa bewalo tourismko ra•baaniko mesokani ong•anggen ine ka•dongsoenga.
Na·simang iakoba nina man·gen:
Na·simang iakoba poraina man·gen: M’laya sorkari HNLC baksa tom·tomanina agan-golpogrikaniko dakna pangnan kusi ong·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
