Shillong, June 14: Mija June jani 10 tariko MBOSE ni porikkarangko parakatanio class 10 ni porikkao 15 gipa, gadango niksengako man•gipa Mawsmaini New Era Secondary Schoolni Sohan Thapana Jirang constituencyni MLA Sosthenos Sohtun mande ra•e tom•aniko ong•ataha. MLA ua tom•ao mongsonggipa ong•e Sohan Thapana tangka aro laptopko boksis on•anagaha.
Maswaio donggipa New Era Secondary Schoolko 2003 bilsio kuliahachim. Ia skul namen neng•nikanirangko chagrongronggipa ong•a. Klass kutturirang, aro indakgipa gipinrango namen neng•nikaniko chagrongna nangenga. Ia skul bang•a neng•nikanirangko chagronggenchimoba namnamgipa chatro-chatrirangko ong•katatna man•skaenga. Sohan Thapa subject 5 o namnambate markrangko man•e pass ka•aha. Ua Science subjecto 100 aro Nepali subjectoba nambatsrange markrangko man•e pass ka•aha.
