Shillong, Oct 19: A·songo gitchambatsranggipa ge·sa political party Congress dolko mikkangchi dilna gita Presidential election-rangko ong·atanganio Pa Mallikarjun Kharge, gimik 7,897 vote-rangko man·e chegipa ong·aha, indake unbaksa susarimgipa Pa Shashi Tharoor mangmang 1000 vote-rangkosan man·aiaha jeoni bangki 416 vote-rangde den·galako man·aha.
Congress dolni president-ni chokkina eleksinko ong·atgipao, ma·mongni gitcham minster-rang Pa Mallikarjun Kharge baksana Pa Shashi Tharoor-maang susagrikangaha, indake a·songni ma·ambio bilsi 24-rangni ja·man ian skanggipa chang ong·e Congress dolko Nehru-Gandhi ma·chongoni ong·gijagipa mandechi dilangskagnok. Da·o, padotna gital seokako man·gipa, batanggimin 2019 bilsio Te Rahul Gandhi-ni kamtangko wate on·ani ja·man baditaba somoirangna jako ra·e ka·baenggipa Ma Sonia Gandhi-ni biapko ra·angskagen.
Unomiting, “India-o namen gitchambatgipa Congress dolko padot ong·e dilna seokako man·aniara namen rasong gnangbeani ong·chongmota aro dilgipa ong·anio daitorang namen raka ine janapatan baksa ia kamko mikkangchi jako ra·e ka·anggnigipa aro AICC-ni padotna seokako man·gipa Kharge ji-na dingtangmancha angni nama-sikanirangkoba on·na kusi ong·a ine Pa Tharoor seachi janapataha.
