Shillong, Feb 11: Congress dolni sakbonga MLA-rangko National People’s Party (NPP)-chi dilenggipa Meghalaya Democratic Alliance (MDA)-o rimnapahani gimin Sukrobar salo, a•dokni BJP dol suk ong•gijaniko parakataha.
Sukrobar salo, BJP tom•aniko Shillong songjinmani BJP office-o ong•atangani ja•man kobor ra•timgiparangna talatangengon, Congress dolni MLA-rangko MDA-o rimnapani gimin BJP-ni dilgiparang, chief minister-ni kamo suk ong•nikjaenga aro iani bidingo BJP-ni dilgiparang chief minister-na sedoate talataniko on•china dabigen ine BJP-ni state president Ernest Mawrie parakataha.
MDA sorkarina Congress dolni chakpaaniko on•ani bidingo BJP-na see on•aniko nanggen ineba Mawrie aganaha.
A•bachengonin BJP dol, Congress doloni jakgitel ong•gipa a•songko ong•atna kam ka•engani gimin chief minister-ni talate on•aniko nanggen ine Meghalaya BJP-ni in-charge Dr Chuba Ao parakatskaaha.
MDA sorkarina Congress dol chakpaaniko on•na nangnikenga ine see on•aniko man•genchimode maming neng•nikani dongjawa ineba Ao aganaha.
