Shillong, April 21: Meghalaya a•doko COVID-19 ta•raken giproroengani gimin Budbar salo, a•dokni Chief Minister Conrad K Sangma, dingtang dingtang a•jani deputy commissioner-rang aro health department-ni official-rang baksa tom•aniko ong•atangaha aro uni ja•man cabinet minister-rang aro dingtang dingtang sorkari official-rang baksaba tom•aniko ong•atangaha.
Ia tom•anio a•dokni Deputy Chief Minister Prestone Tynsong, Health Minister AL Hek aro Education Minister Lahkmen Rymbui-ba dongpae bak ra•angaha aro COVID-19-ni ta•rake giproroenganiko champengna rakgipa niamrangko ra•gatna manchiangaha.
Tom•a matchotani ja•mano a•dokni Deputy Chief Minister Prestone Tynsong, kobor ra•timgiparangna talatangengon, Shillong-o obostarang namjabatroroengani gimin a•dokni gipin biaprango donggipa manderangko da•o dipet Shillong-ona re•bakujachina didienga ine parakataha.
“Meghalaya a•dokona re•baenggiparang, re•bapilenggiparang aro East Khasi Hills a•jaona re•baenggipa pilakan RT-PCR porikkako ra•na nangtelgnok. Da•ode chinga gipin a•dok sorkarirangni on•gipa COVID test certificate-rangko ra•chakjawaha aro porikkako an•tangtangsa ra•e nignok. Indake ong•genchimoba je manderangan COVID-ni tika changgniko ra•mane certificate-rang donggenchim, uandakgipa manderangkode chinga a•doko napna on•aigen,” ine Deputy Chief Minister parakataha.
Deputy CM-ni parakatani gitade, ia tika su•ani certificate-rangko a•dokni pilak entry point-rangon mesokna gita nanggen.
Gipin a•dokni manderangkoba ua da•o dipet Meghalaya-ona re•bakujachina gita didiataha.
Indake ong•engon, East Khasi Hills a•jao obostarang namjabatengani gimin tourist spot-rangko April 30 tarikona, Shillong-o donggipa college aro university-rangko May-ni 3 tariko chipe donatchenggen indiba porikka sechakenggipa centre-rangkode kulina on•anggen ine Tynsong parakataha.
Class-rangko internet gita ra•skachina gitaba sorkari, college aro university-rangko didiataha.
Apsan daken, East Khasi Hills a•jao donggipa gym-rang, swimming pool-rang, game kal•chakgipa biaprang, cinema hall-rang, kni ratgipa dokkanrang aro bar-rangko April 23 tarikoni April 30 tarikona chipe donatchenggen ine Deputy CM parakataha.
Nangchongmotgipa bosturangko palgipa dokkanrangna agrede gipin dokkanrangko April 26 tarikoni May 2 tarikona chipe donatskaenga.
Tynsong-ni u•iatani gitade, pilak sorkari office-rangon kam ka•giparang 33 percent-na bate office-o napna man•jawa.
